Роси (Јамаха) со триумфот на трката за Големата награда на Холандија стана првиот човек, по Џакомо Агостини, кој забележал 100 триумфи во сите класи од најелитното мотоциклистичко натпреварувње.

Италијанскиот мотоциклист Валентино Роси (Јамаха) со победата на трката за Големата награда на Холандија стана првиот човек по Џакомо Агостини кој забележал 100 триумфи во сите класи од најелитното мотоциклистичко натпреварувње, Мото ГП. Докторот до својата јубилејната 100-та победа на патеката Асен стигна за 43.14.611 минути, пред неговиот клупски колега, Шпанецот Хорхе Лоренцо и Австралиецот Кејси Стонер (Дукати).

Стартот на трката донесе многу промени на првата позиција. На самиот почеток поведе Шпанецот Дани Педроса (Хонда), но тој не се задржа многу на лидерското место, бидејќи шампионот од пред две години Стонер, со еден потег го мина и го презеде првото место. Меѓутоа и Австралиецот не успеа долго да се задржи на чело на колоната, бидејќи на стартот од вториот круг беше минат од Роси, кој во ниеден момент, во наредните 24 кругови, не беше загрозен.
-Многу сум среќен. Ова е посебен ден во мојот живот, бидејќи никогаш нема да го заборавам моментот кога стигнав до својата 100-та победа во кариерата. Во овој голем момент за мене би сакал да му се заблагодарам на целиот тим. Јамаха многу ме бодреше и мотивираше во последниве четири-пет години. Се надевам дека ќе возам уште многу сезони и оти значително ќе го зголемам бројот на победи, изјави Роси.

Победата во Холандија му го донесе и првото место во генералниот поредок на Роси, кое пред трката го делеше со Лоренцо и Стонер. Тоа беше прв пат во историјата на Мото ГП тројца мотоциклисти да имаат ист број на бодови. Докторот со 131 бод е на првото место, пет помалку има Лоренцо (126), а на третото место е Стонер со 122.

Во конкуренција на тимовите убедливо води Јамаха со 257 бодови, пред Дукати 148 и Хонда со 136 бодови. Јамаха е прва и во поредокот кај конструктори со 165 бодови.