Правите антипропаганда и со ЦИА работите. Вие сте за ќотек. Сите сте мафијаши. Треба да ви биде срам. Вие работите против државата. Да можам би ве затворил сите!


Пратеникот Амди Бајрам вчера упати тешки закани до новинарите кои ја следеа работата на Собранието. Бајрам не бираше зборови во навредите кон претставниците на медиумите. Изнервиран од тоа дека новинарите не побарале изјава од него се обиде да го привлече вниманието со тоа што им се закани и со физички напад. Инцидентот се случи во време кога пратеничката на Нова Демократија, Флора Кадриу, даваше изјава за амандманот на Нова Демократија во врска со стратегијата за името поредложена од Стојан Андов.

-Сега се интересирате сите новинари. А камо тука за правата на Ромите и Турците. Правите антипропаганда и со ЦИА работите. Вие сте за ќутек. Вам ќутек ви треба. Сите работите за пари.

Зошто не соработувате со нас, со помалите етнички заедници. Сите сте мафијаши. Треба да ви биде срам. Вие работите против државата. Да можам би ве затворил сите. Да сум некој министер, одма ќе истражам од каде ви се информациите. Би ве пратил јас во затвор, се закануваше Бајрам.

Запрашан од новинарите за што тој работи, Амди одговори:

-Пратениците со личниот доход не можат ниту тековните трошоци во Парламентот да си ги покријат. Свесен сум и намерно ве навредувам. Ве провоцирам за да ме тужите. Јас сум пратеник во Собранието и зошто не ме прашувате.

По инцидентот група новинари побараа прием и осуда на гестот на пратеникот, од Претседателот на Собранието Трајко Вељановски.

-Поаѓајќи од основните принципи на парламентарната демократија во која самостојноста и независноста на новинарите и медиумите загарантирана, ги осудувам и се оградувам од сите вербални или други било какви напади врз медиумите и новинарите. Се надевам дека последниот инцидент, навистина ќе биде последен, бидејќи и како пратеници и како Парламенст сме одговорни за остварување на демократските принципи, се вели во реакцијата на Вељановски.