Во 2010 година загребската компанија „ Док-инг„ би можела да почне со сериското производство на првиот хрватски автомобил.

Малиот и лесен автомобил за две лица, долг едвај 260 сантиметри, е дело на главниот инженер и сопственик на фирмата Вјекослав Мајетиќ.
Автомобилот со засега работното име „ДЏД“ ќе се движи на електромотори со батерии од новата генерација, кои обезбедуваат возење до 250 километри. Планираната брзина на автомобилот е до 120 километри на час, а агрегатите веројатно ќе ги обезбедува компанијата Тема од градот Пула.

Се планира покривот на автомобилот да биде од специјално стакло, но на крајот последната одлука ќе биде на конструктурите, имајќи ја предвид пред се безбедноста на патниците.

Се размислува и за варијантата механизмите за управување да можат да се преместуваат од левата на десната страна од предниот дел на автомобилот.

Вредноста на автомобилот ќе зависи и од видот на акумулаторите, бидејќи е предвидена и можноста за монтирање на значително поевтините оловни батерии. И покрај тоа, проектната цена засега се движи околу 10.000 евра со оглед на фактот дека се исполнуваат високите критериуми за бесшумни и еколошки чисти автомобили.

превземено од КИРИЛИЦА