Силоси ќе прават пивка вода во пустина.Концепцијата на автономни системи за производство на вода може да се примени и за мали базни станици, но и за инсталации што би биле доволно моќни да снабдуваат со вода луксузни хотели.

 

Автономни силоси, кои ќе се напојуваат со сончева енергија, би требало да почнат да се инсталираат во пустините каде што влагата од воздухот ќе ја претвараат во вода за пиење, најавуваат германски научници.Тие велат дека и во најсушните предели во светот, каде што освен кактуси нема друга вегетација, а од животинскиот свет во овие пеколни услови успеваат да преживеат само инсекти и некои видови змии, воздухот содржи одреден степен на влажност, која може да биде искористена за создавање пивка вода.За пример ја земаат израелската пустина каде што просечната влажност на воздухот изнесува 64 проценти, што значи дека во еден метар кубен има 11,5 милилитри вода.Научниците од институтот „Фрауховер“ за иновативно инженерство и биотехнологија, лоциран во Штутгарт, тврдат оти во соработка со компанијата „Логос иновејшн“ пронашле начин како да го остварат ова.

- Процесот што го откривме се темели исклучиво на обновливите извори на енергија како соларните колектори и фотоќелиите што оваа метода ја прават целосно енергетски независна. Поради ова, автономните системи што ќе бидат во облик на силоси, ќе може беспрекорно да функционираат во подрачја каде што воопшто нема електрична инфраструктура - изјави Сигфрид Егнер, директор на одделот за развој во „Логос иновејшн“.Тој додаде оти горниот дел од силосот ќе биде исполнет со заситена солена течност, која ќе ја впива влагата од воздухот. Потоа таа ќе се вшмукува во резервоар поставен на неколку метри од површината на земјата, кој ќе биде под вакуум. Енергијата добиена од соларните колектори ќе го загрева резервоарот, по што пареата ќе се кондензира. Тогаш водата ќе ја вшмукува вакуумска пумпа и преку цевки ќе ја складира во втор резервоар. По филтрацијата, кондезираната вода ќе биде употреблива за пиење.

- Концепцијата на автономни силоси може да се примени за различни типови постојки. Може да се конструираат системи за мала базна станица или инсталации што би биле доволно моќни да снабдуваат со вода и луксузни хотели. Вистинска оаза во срцето на пеколните жештини - изјави Егнер.Од институтот „Фрауховер“ соопштија дека прототипот е веќе тестиран во лабораторија при што дал задоволителни резултати. Сепак, засега нема најава кога овие инсталации ќе почнат да се вградуваат во пустините.


Текстот е превземан од дневниот весник „Дневник“