„КОСМОФОН“ и „ОН-НЕТ“се спојуваат во една компанија со едно заедничко име. Ќе нудат нови услуги, како WiMax и IpTV, нема намалување на цените.

Нов менаџерски тим ќе раководи со клучните функции во моќниот телекомуникациски оператор Космофон. Првиот извршен директор на компанијата Оливие Понсин денеска изјави дека во следниве неколку дена ќе бидат назначени новите имиња.

Ќе има стари кадри од Космофон, но и нови од ОН НЕТ и од Словенија. Според најавите на Понсин, тој останува во врвот на Космофон, и активно ќе работи на спојување на компанијата со интернет провајдерот ОН нет.

Процес кој треба да заврши до крајот на годината. Неминовно ќе биде и отпуштање на вработените, но, се уште е рано да се каже колку луѓе ќе заминат од Космофон.

Активно се работи и на ново име и ново лого за вториот мобилен оператор. Ќе се скратат и некои технологии, кој според првиот човек на компанијата Космофон, ги имал премногу.

Допрва ќе се носи одлука која од нив нема повеќе да се развива, а во моментов се размислува тоа да биде Вајмакс технологијата. Со нов пакет заеднички услуги од двете компании Космофон ќе излезе следниот месец. Цените нема да бидат пониски од досегашните. Велат дека на пазарот ќе конкурираат со услугата а не со цената, која според нив е доволно намалена.

Под новиот заеднички бренд ќе биде и дигиталната телевизија, која треба да стартува од септември. Со неа ќе раководи Предраг Чемерикиќ, кој доаѓа по неколку годишното успешно раководење со интернет провајдерот Он нет.