Во текот на летниот период се зголемуваат шансите за расипување на храната. Следните совети може да помогнат тоа да се избегне и храната да се сочува во најсвеж можен облик.

 Не купувајте оштетено овошје и зеленчук, надуени конзерви, заледени пакувања храна како и неправилно спакувана храна.

 Замрзнатата храна по купувањето треба во што е можно пократок рок да се стави во замрзнувач и да не се дозволи да почне да се топи.

 Меленото месо, изнутриците, пилешкото месо и риба најбрзо се расипуваат, па затоа не треба да стојат во фрижидер подолго од два дена во најладниот дел (околу 0 степени Ц).

 Спакуваното месо се чува најмногу 5 дена во фрижидер. Иако е на ниска температура, може да дојде до површински развој на микроорганизми па пожелно е пред употреба да се провери слузавоста на површината и мирисот.

 Храната која се расипала веднаш треба да се фрли бидејќи може да ја контаминира останатата храна.

 Одмрзнувањето на месото треба да се прави во фрижидер 24 часа пред подготовката.

 Еднаш одмрзнатото месо и риба мора да се фрлат ако истиот ден не се употребат. Останатата одмрзната храна може да се чува во фрижидер до 48 часа.

 Отворените конзерви добро заштитете ги од можен допир со сирово месо или риба, а најдобро е содржината да се префрли во пластичен сад.

 Садовите и приборот со кој се обработува сировото месо, риба или јајца треба да се мијат со детергент во врела вода.