Масажата е една од најстарите форми на лекување. Кинезите имаат документи стари повеќе од 3000 години во кои се споменува масажата. Исто така, Индијците, Персијанците и Египќаните користеле различни форми на масажа при лекување на болестите.

Дури и Хипократ во своите записи препорачувал да се користи допир и триење за проблеми со циркулацијата и болки во зглобовите.

Денес, масажата е важен сегмент на многу програми за рехабилитација и е докажана при лекување на различни хронични заболувања, како на пр.: болки во половината, артритис, исцрпеност, висок крвен притисок, дијабетис, намален имунитет, неплодност, кризи при откажување од цигари, депресија и многу други.

Постојат повеќе од 250 техники на масажа кои вклучуваат допир, притисок, вибрации, размесување или удирање по мускулната маса или мекото ткиво на телото. Се користат и масла, лосиони и пудри со цел да се намали триењето на кожата.

И како што многу од нас имаат почувствувано, масажата го намалува стресот што го создава секојдневието, а со тоа помага да се бориме со најголемиот проблем на денешницата - дебелината.
Имено, стресот прави масните наслаги да се складираат онаму каде што најмалку сакате – на стомакот. Со масажата ќе го намалите стресот и килограмите – на најрелаксиран можен начин. Ако пак сметате дека масажата е непотребен луксуз во Вашиот животен стил, еве зошто треба да го смените мислењето:
Стресот го произведува хормонот кортисол кој кога е насобран, освен што ги оштетува меките ткива и нервите, го поттикнува и создавањето на инсулин. Можеби малку инсулин звучи безопасно, но токму тој му „кажува“ на телото да складира маснотии во абдоменалниот дел.

Против котисолот можете да се борите на тој начин што ќе го потрошите со фитнес вежби (кои исто така силно Ви ги препорачуваме) или ќе го намалите неговото производство со тоа што ќе се релаксирате (на пр. со масажа).

Но, складирањето на маснотиите не е единственото зло од продукцијата на инсулин – оттаму доаѓа и потребата за внесување на висококалорична храна, полна со шеќери. Значи, стресот освен што прави да складирате маснотии, прави и да јадете храна која лесно се претвора во маснотии.
Токму затоа, со масажа ќе ги намалите и постојаните нагони за „благо“ и „грицки“.

И на крајот, допирот и притисокот при масажата ја поттикнуваат циркулацијата на крвта, го забрзуваат метаболизмот и ги опуштаат мускулите. На тој начин, Вие лесно можете да ја одржувате својата килажа, да ги тонирате мускулите и се разбира - да изгледате одлично.