Вистинскиот начин да ги освежите телото и духот.Првично и најмногу на сауната треба да се гледа како на ефикасен начин за релаксација и освежување.

Докажано, придонесува полесно да се справувате со секојдневниот стрес, Ви ја обновува енергијата и обезбедува мир за умот и телото.
Но, благодетите од сауна третманот се многубројни. Издвоивме неколку од значајните ефекти за здравјето, особено за оние од Вас кои досега никогаш не ја пробале сауната.

10 до 20 минутната сауна го зголемува пулсот за 50-75%. Ова е исто како при интензивна физичка активност.
Делува на крвниот притисок и циркулацијата. За време на сауната, крвните садови се шират, со што се зголемува протокот на крвта и таа побрзо доаѓа до екстремитетите.

Зголемената циркулација значи и зголемено движење на хранливите материи до површинското ткиво. Резултатот е здрава и блескава кожа.
Потењето има прочистувачки ефект и посебно делува на најголемиот човечки орган – кожата. Дури 30% од непотребните материи се исфлаат преку кожата. Сауната ги отвора порите, го зголемува потењето, а со тоа врши комплетна детоксикација на телото.

Кога сте во сауна, температурата на кожата се зголемува до 40°C, а внатрешната температура на телото до 38°C. Ова за организмот е еден вид на вештачка грозница. Еве како со овој ефект Вашето тело станува поздраво: грозницата е дел од процесот на природно заздравување и го стимулира имунолошкиот систем со што придонесува за зголемено создавање на антитела, бели крвни зрнца и интерферон (антивирусен протеин со способност за борба против канцерот).

Сауната во комбинација со масажата ефективно го намалува целулитот.
Доброто препотување ги отстранува и симптомите на настинка и грип.

Како останати благодети поврзани со сауната ќе ги наведеме:

Ослободување од вкочанетоста и болките предизвикани од артритис.
Помош при лекување на респираторни проблеми: бронхитис, ларингитис, синуситис...
Релаксирање на уморните и згрчени мускули по физичка активност.

Прв пат во сауна? Еве што треба да знаете и правите!

Соблечете се, истуширајте се, исушете се и влезете (носејќи единствено крпа) во сауната. Првичното непријатно чувство предизвикано од топлината брзо исчезнува штом ќе се навикнете. Затоа започнете со покуси временски периоди – на пр. со 4 минути. По неколкуте минути внатре излезете и истуширајте се со поладна вода. Повторно влезете и останете подолго. Потоа, излезете, истуширајте се повторно, одморете се и облечете се.

Оние кои страдаат од некакво заболување претходно треба да се консултираат со својот доктор.

Дали сауната истоштува?

Доколку ја практикувате онолку колку што е препорачано, сауната ќе направи да се чувствувате посвежи и повитални.


Дали топлината ја оштетува кожата?
Не, сосема спротивното! Сауната го забрзува метаболизмот, го зајакнува имунитетот и помага при обновувањето на клетките на кожата.

Дали сауната им штети на бремените жени?

Со само 2 минути во сауна, се подобрува забавениот метаболизам од бременоста. Но како и за сé останато, бремените жени прво треба да се консултираат со својот доктор.

Уживајте во омилената арома

Веднаш по сауната, порите се отворени и кожата е во одлична впивачка состојба. Затоа, тоа е вистинското време да го нанесете антицелулитниот гел или пак да уживате во миризлива купка со морски минерали. Одберете ја својата арома...еукалиптус, ванила, лаванда, кокос....и поминете го денот уживајќи во неа.